Pas muajsh spekulimesh dhe thashethemesh rreth modelit të ardhshëm të OnePlus, telefoni u zbulua zyrtarisht këtë javë. OnePlus 11 u lansua në tregun kinez (prezantimi për tregun global është paralajmëruar për muajin e ardhshëm) dhe përdoruesit tashmë mund ta porosisin atë, ndërsa shitjet fillojnë të hënën, më 9 janar.
Siç u njoftua, telefoni vjen me harduer të fuqishëm dhe karikim të shpejtë, dhe mund të jetë me interes për këdo që po mendon të blejë një telefon të mençur të modelit më të lartë Android këtë vit. Diagonalja e ekranit AMOLED është 6.67 inç, me rezolucion 2K dhe shpejtësi rifreskimi 120 Hz.
Ai mundësohet nga çipi Snapdragon 8 Gen 2 i Qualcomm, i cili sjell deri në 35 për qind performancë më të mirë në krahasim me paraardhësin e tij, dhe telefoni do të jetë i disponueshëm me një maksimum prej 16 GB RAM. Kapaciteti i baterisë është 5000 mAh dhe mbështet karikimin 100 W përmes kabllit duke përdorur sistemin SuperVOOC të Oppo.
Në anën e pasme të pajisjes ka tre kamera – sensori kryesor Sony IMX980 prej 50 MP, më pas një kamerë ultra e gjerë 48 MP dhe një kamerë portreti 32 MP me sfond të avancuar dhe efekte të turbullimit të thellësisë. Ka një kamerë selfie 16 MP në pjesën e përparme, dhe kamerat në këtë pajisje janë bërë gjithashtu në bashkëpunim me Hasselblad.
Nëse është e vërtetë thënia se dita e mirë shihet në mëngjes, atëherë OnePlus mund të presë shifra të shkëlqyera shitjesh për telefonin e tyre. Gjegjësisht, siç njoftoi presidenti i departamentit kinez të kompanisë Li Jie, OnePlus 11 theu rekordin e shitjeve vetëm dy orë pas hapjes së para-porositjeve. Çmimi për tregun kinez është 545 euro për modelin me 12/256 GB, 600 euro për modelin me 16/256 GB, ndërsa varianti më i shtrenjtë me 16 GB memorie dhe 512 GB hapësirë për ruajtjen e të dhënave është 670 euro./ GSM Arena
