Kriza ekonomike, e krijuar nga pandemia e COVID-19 do të ndryshojë thellësisht ekonominë botërore drejt ekologjisë, digjitalizimit dhe metodave të punës dhe Europa ndodhet në një pozicion të shkëlqyer në këtë situatë, vlerësoi sot presidentja e BQE-së, Christine Lagarde.

“Kjo krizë do të jetë një përshpejtim i transformimeve të cilat tashmë ishin latente në ekonomitë tona”, parashikoi ajo, e pranishme në një video-konferencë në takimet ekonomike në Paris.

Lagarde shtoi se në prodhim, në punë dhe në tregti do të përshpejtohen transformimet.

“Aktualisht, vlerësohet se kriza duhet të çojë në një tkurrje të zinxhirëve të furnizimit prej rreth 35% dhe një rritje të robotizimit në industri nga rreth 70 në 75%. Për më tepër, për shkak të mbylljes që preku shumicën e banorëve të planetit në të njëjtën kohë, tregtia online është zhvilluar në mënyrë të konsiderueshme. Ky zhvillim duhet të përshpejtojë më tej në të ardhmen në dëm të tregtisë më tradicionale”, shtoi Lagarde.

Siç ka thënë ajo, përballë këtyre transformimeve, Europa është në një pozitë të shkëlqyer për të ndërmarrë këtë lëvizje. /Gazeta Sinjali/