Dy paciente që kanë shkuar për ta gjetur shërimin në Spitalin Amerikan në Kosovë, nga aty kanë dalë më të sëmura. Ndonëse i përkasin profileve të ndryshme, madje, njëra nga to është ish-deputete e Kuvendit të Kosovës, historitë e tyre janë të ngjashme. Të dyja janë operuar nga mjeku Sabri Tmava i cili pavarësisht komplikimeve shëndetësore që u janë shfaqur pas operacionit i ka liruar për në shtëpi. Përkundër dhimbjes së tmerrshme, pacientet kanë humbur drastikisht edhe peshën trupore, megjithatë ky fakt nuk i ka interesuar mjekut në fjalë, ai ka insistuar se janë ‘mirë’. Por, pacientet janë bërë mirë pasi janë rioperuar në spitale tjera të rajonit.

Ish-deputetja e Kuvendit të Kosovës (emër i njohur për redaksinë), ka ushtruar kallëzim penal për trajtim të pandërgjegjshëm mjekësor ndaj dy mjekëve të Spitalit Amerikan, specialistit në kirurgjinë e përgjithshme, Sabri Tmava endoskopist dhe mjekut specialist me shtetësi turke, Ugur Gozalan.

Në kallëzimin penal thuhet se ndaj të dëmtuarës, mjekët Tmava e Gozalan, gjatë ushtrimit të detyrës, me veprimet dhe mosveprimet e tyre gjatë ndërhyrjes kirurgjike, më datë 08 janar 2016  kanë përdorur metodën e papërshtatshme mjekësore dhe nuk kanë ndërmarr veprimet e duhura mjekësore, ku për pasojë, të dëmtuarës i është keqësuar rëndë shëndeti dhe i është rrezikuar jeta.

Të dëmtuarës, kjo gjendje i kishte zgjatur për rreth dy muaj derisa ishte detyruar të bënte ndërhyrjen e fundit kirurgjike në një spital në Podgoricë ku edhe ishte shëruar.

Padi ndaj Spitalit Amerikan ka paralajmëruar edhe qytetarja N.K., e cila në një rrëfim për Gazetën Sinjali, thotë se pas operacionit ‘shpirti jem e di qysh i kam përjetu ato ditë’.

Për operacionin që sipas N.K. ka dështuar, ajo është dashur të paguajë rreth 3 mijë euro në Spitalin Amerikan dhe në fund është detyruar të rioperohet në një spital privat në Maqedoninë Veriore, ku edhe e ka gjetur shërimin.

Pacientja me inicialet N.K., ka rrëfyer përvojën e saj për Gazetën Sinjali pas publikimit të një serie shkrimesh për mashtrimet që familjarët e një pacienti pretendojnë se u janë bërë nga mjekët e Spitalit Amerikan. Rrëfimin e saj të plotë mund ta lexoni KËTU./Gazeta Sinjali/