Policia e Kosovës, mbrëmë, në fshatin Kormnjan, ka parandaluar një tentim të kontrabandimit të mallrave, që tentohej të futeshin në mënyrë ilegale në territorin e Republikës së Kosovës.
Pas pranimit të informatës, Policia menjëherë ka ndërmarrë veprimet e nevojshme për identifikimin e personave të dyshuar.
Policia ka arritur që në një lokacion në rrugë malore, të gjejë një rimorkio të improvizuar. Në rimorkio janë gjetur të ngarkuara pije të ndryshme, alkoolike e jo alkoolike.
Siç njoftojnë nga Policia, në konsultim me prokurorin, janë ndërmarrë veprime të tjera të nevojshme dhe është iniciuar rasti ”Kontrabandim me mallra”.
Në vazhdën e parandalimit dhe luftimit intensiv, të kontrabandës me mallra, Policia ka parandaluar edhe një rast tjetër, sot, më 24.05.2022, rreth orës 11:30.
“Njësia policore nga Sektori për Operativë, të Drejtorisë Rajonale Kufitare “Veriu”, bazuar në analizën e informacioneve, në vendin e quajtur Srbovac – Komuna e Zveqanit, kanë ndaluar automjetin ‘VW Caddy’ me vozitës mashkull, automjet i cili ishte i ngarkuar me mallra të ndryshme ushqimore të cilat dyshohet se janë kontrabanduar nga Serbia“, thuhet në njoftimin e Policisë.
Automjeti dhe mallrat e dyshuara janë sekuestruar dhe dërguar në Terminal Doganor, është njoftuar prokurori kompetent dhe me autorizim të tij është iniciuar rasti ”Kontrabandim me mallra”, për procedura të mëtejme ligjore.
