Policia e Kosovës në komunën e Podujevës ka intervistuar kryeimamin e këtij qyteti, Bekim Jasharin, si dhe Rrahim Fejzullahun, axha i të ndjerit, Lulzim Fejzullahu, lidhur me deklaratat për hakmarrje.
Dyshja janë intervistuar në cilësinë e të pandehurve.
Kjo pasi më 27 janar, Kryeimami i Podujevës, Bekim Jashari ka bërë të ditur se familja e të ndjerit, Lulzim Fejzullahut i ka dhënë një muaj besë familjes së dorasit.
“Rrahim Fejzullahu, mixha i të ndjerit Lulzim Fejzullahu, e nderoj Zotin e Kombin tonë me dhënie të besës (Një muaj nga sot ) për familjen e dorasit. Zoti e mëshiroftë Lulin, e bekoftë familjen e madhe të Rrahimit”, kishte shkruar Jashari në Facebook.
18 vjeçari Lulzim Fejzullahu ka vdekur të shtunën e 20 janarit në Qendrën Klinike Universitare të Kosovës (QKUK), ku po trajtohej pasi ishte goditur me veturë e rrahur brutalisht për vdekje nga dy të mitur më 14 janar.
Të miturit A.A dhe E.K dyshohen për vrasje të rëndë dhe janë dërguar në paraburgim.