Gazeta Sinjali raportoi sot për një aksion të Drejtorisë për Hetimin e Krimeve Ekonomike në Policinë e Kosovës në koordinim me Prokurorin e Shtetit që po zhvillohet në degën e Administratës Tatimore në Gjakovë.
Krimet Ekonomike kanë zbarkuar në degën e ATK-së, nën dyshimin se disa inspektorë janë përfshirë në veprime të kundërligjshme.
Lajmin e ka konfirmuar për Sinjalin edhe Policia e Kosovës, pa dhënë detaje të tjera.
“Mund të konfirmojmë se, Policia e Kosovës me njësitë e DHKEK-së, në bashkëpunim dhe koordinim me institucionet kompetente, në DRP Gjakovë ka realizuar një operacion policor. Pas përfundimit të operacionit policor, do të bëhen publike informacione shtesë.”