Gazeta Sinjali sot ka raportuar për një vdekje të dyshimtë të një foshnje të porsalindur në Klinikën Gjinekologjike dhe Obstetrike në Qendrën Klinike Universitare të Kosovës. Babai i foshnjës dyshohet se është informuar gabimisht nga infermierja se fëmija i tij ka lindur shëndosh e mirë, derisa foshnja që lindi bashkëshortja e tij, ka lindur pa shenja jete.
Lidhur me këtë, Gazeta Sinjali ka tentuar të marrë një përgjigje zyrtare nga drejtori i Klinikës, Zef Ndrejaj, por i njëjti ka refuzuar të përgjigjet.
“Po m’pengoni. Mos m’thirrni për ksi senesh”, tha shkurt Ndrejaj para se t’ia mbyllte telefonin gazetares së Sinjalit.
Ndryshe, pasi burri e kuptoi që fëmija i tij nuk ka arritur që të shpëtojë, ai rastin e ka denoncuar edhe në Polici, me ç’rast me urdhër të prokurorit, trupi i pajetë i foshnjës është dërguar në Institutin e Mjekësisë Ligjore për obduksion.
Sinjali mëson se i njëjti dyshon se foshnja e tij është ndërruar pas lindjes, meqenëse kanë qenë dy lindje me shumë pak minuta diferencë.
Raportohet se ka qenë infermierja ajo e cila rrugës për ta dërguar foshnjën e lindur të gjallë në repartin e neonatologjisë, ka ngatërruar babain e foshnjës së gjallë, me atë të foshnjës së vdekur.
Me urdhër të Prokurorit të Shtetit, rasti është iniciuar ‘Trajtim i pandërgjegjshëm mjekësor’, teksa me detajet e reja lidhur me rastin, Sinjali do t’iu mbajë të informuar ditëve në vazhdim.