Policia e Kosovës ka arrestuar një person në Pejë për veprat penale ‘Mbajtje në pronësi, kontroll ose posedim të paautorizuar të armëve’ dhe ‘Lëndim lehtë trupor’

Ngjarja ka ndodhur në rr.”Zenel Podrimqaku”, në fshatin Novosellë, teksa një person viktimë kishte shkuar te shtëpia e vëllait të tij për ta ndërprerë dhunën që shtronte ndaj bashkëshortes së tij.

Me këtë rast personi që po rrihte gruan e sulmon vëllain e tij duke e goditur me grushte. Ndërkohë, aty vjen edhe vëllai tjetër për ta qetësuar situatën por i dyshuari futet brenda, nxjerr armen gjysmë automatike dhe me të sulmon vëllain e dytë duke e goditur me tytë (kondak) të armës, më ç ‘rast i shkakton lëndime të dukshme në anën e djathtë të kokës. 

Me këtë rast, ka ndërhyrë patrulla e policisë e cila e ka futur situatën nën kontrollë dhe e ka arrestuar personin e dyshuar.

I dyshuari, F.P. i lindur 1970 është intervistuar ndërsa arma e cila është përdorur në rast, është konfiskuar. Pas intervistimit të dyshuarit me urdhër të prokurorit është dërguar në mbajtje për 48 orë. 

Viktimave u është ofruar ndihma mjekësore dhe pas intervistimit janë liruar. / Sinjali/