Ushtria izraelite ka ndërmarrë një valë të re sulmesh ajrore të martën, duke goditur objektiva në Siri dhe Liban, në një përpjekje për të garantuar sigurinë e kufirit verior të vendit.
Sulmet në Siri shënjestruan forcat qeveritare të udhëhequra nga ish-rebelë islamistë, të cilët morën pushtetin pas rrëzimit të Bashar al-Assad në dhjetor – një ndërhyrje e rrallë e Izraelit ndaj qeverisë së re siriane.
Ndërhyrja erdhi pas disa ditësh përleshjesh sektare në rajonin jugor të Sweida-s, ku pati përplasje mes grupeve beduine dhe milicive të pakicës Druze. Qeveria e re siriane kishte dërguar forca për të qetësuar situatën, por ato u përfshinë në luftime që lanë dhjetëra të vdekur, duke thelluar dhunën sektare në vend.
Izraeli, që historikisht ka pasur lidhje të ngushta me komunitetin Druze brenda kufijve të tij, është zotuar të mbrojë Druzët edhe përtej kufirit, në Siri.
Ndërkohë, në Liban, avionët izraelitë goditën objektiva në Luginën Bekaa – një zonë e njohur për mbështetjen që i jepet Hezbollaut. Këto sulme janë pjesë e një serie të intensifikuar kundër grupit të mbështetur nga Irani, që sipas zyrtarëve dhe diplomatëve libanezë, kanë për qëllim ta detyrojnë atë të çarmatoset.
Ministri i Mbrojtjes i Izraelit, Israel Katz, reagoi pas sulmeve duke deklaruar: “Një mesazh i qartë” – kështu i cilësoi ai goditjet ajrore, të cilat, sipas tij, ishin drejtuar si ndaj Hezbollaut ashtu edhe ndaj qeverisë libaneze.
“Izraeli do t’i përgjigjet me forcë maksimale çdo përpjekjeje të grupit për të rivendosur aftësitë e tij ushtarake.”.
Presioni ndërkombëtar ndaj Hezbollaut është shtuar ndjeshëm kohët e fundit, sidomos nga Shtetet e Bashkuara dhe Izraeli, të cilët kërkojnë çarmatimin e tij – një kërkesë kyçe në marrëveshjen e armëpushimit të arritur në nëntor, që i dha fund luftës më të përgjakshme dhe shkatërruese në Liban në dekada.
Sinjali – aty ku e vërteta flet para lajmit!