Kryetari i Aleancës për Ardhmërinë e Kosovës, Ramush Haradinaj, sapo ka dalë nga takimi me kryetarin e Lidhjes Demokratike të Kosovës, Isa Mustafën. Ai tha se kanë biseduar për mocionin kundër Qeverisë Kurti të cilin partia e Haradinajt do ta përkrahë.

“Nuk i kemi dizajnu hapat e mëtejshëm kemi qenë te mocioni, me siguri do të kemi takim në ditët në vijim”, tha Haradinaj para mediave, transmeton Gazeta Sinjali.

“Mbajtja pezull e gjendjes nuk është me dobi, është mirë të ndërmerren veprimet menjëherë edhe mocioni edhe krijimi i një qeverie të re”, shtoi ish-kryeministri.

Ai tha se Qeveria Kurti e ka hek taksën dhe ‘në mënyrën më të keqe të mundshme, i ka shërbyer Serbisë’.

“Nga sot përkrahje mocionit i jep edhe AAK-ja”, tha Haradinaj, me ç‘rast rikonfirmoi edhe njëherë qëndrimin e partisë së tij ndaj mocionit të inicuar nga LDK-ja. /Gazeta Sinjali/