Që një javë, publiku po zien prej debatit të shkaktuar nga publikimi i aferës “Jaranat e Liburnit”. Që nga publikimi i përgjimeve që implikojnë ministrinë e Liburn Aliut në ryshfet, ministri Aliu, dhe këshilltari Florent Ramqaj, këshilltar financiar i Aliut, janë nën trysni të mediave.
Intervista televizive, statuse në Facebook, video promovuese e deklarata në mbrojtje të Aliut e Ramqajt qenë disa prej metodave që Lëvizja Vetëvendosje zgjodhi për t’iu kundërvyer publikimit të këtyre dyshimeve.
Gjatë tërë vikendit të kaluar, zëdhënësi i VV-së, Arlind Manxhuka u mundua të mbronte me “mish e me shpirt” Aliun, duke u shërbyer madje edhe me “fake news”.
Por, diskutimet për aferën “Jaranat e Liburnit”, vazhdojnë ende, teksa LVV ka gjetur një tjetër metodë në qasjen mbrojtëse ndaj Liburn Aliut e Florent Ramqajt.
Aktivistë të VV-së kanë filluar të kërkojnë dorëheqjen e zëvendësministrit Hysen Durmishi, duke tentuar ta pastrojnë figurën e dyshes Aliu e Ramqaj.
Kjo qasje e re në planin për të ‘shpëtuar’ Aliun e Ramqaj, filloi që në mëngjesin e 7 qershorit.
Blend Zymi, përkrahës i zjarrtë i Lëvizjes Vetëvendosje, ishte ndër të parët që targetuan Durmishin, shkruan Nacionale.
Ai në Facebook shkroi se Liburn Aliu s’ka nevojë të fal askënd që nuk di, duke i kërkuar të parit të Infrastrukturës që ta shkarkoj zëvendësin e tij.
Ai shkroi se shumë aktivistë me mund e me shumë sakrifica kanë bërë që të vijë një pushtet i drejt, por që një gjë e tillë nuk po ndodh.
“Secili qytetar e di që pushtetarët në të kaluarën i kanë bo ligjet sipas matematikave tyne, shumë ligje duhet mu ndrru e shumë me ardh t’reja krejt ne rregull po nuk muj i qes hi syve t’mi tu e pa, ngu live Hysen Durmishin e mem kallzu qysh ja ka jep tenderin dostit t’vet se ai ma i përgjegjshëm!”, shkroi Zymi në Facebook.
Në fund, i njëjti i kërkoi kryeministrit Albin Kurti që ta shkarkojë Hysen Durmishin, dyshin e ministrisë së Infrastrukturës.
Por, kundër kësaj qasjeje ka dalë një përkrahës i moçëm i VV-së. Mentor Llugaliu, që njihet si ndër mbështetësit e mëdhenj të partisë në pushtet, në një postim në Facebook ka shkruar se ministri Aliu e ka bërë punën me nder me thënë.
Tutje, ai ka thënë se disa aktivistë po mundohen që të gjithë fajin t’ia veshin Durmishit, në mënyrë që të shpëtohet ministri Aliu.
Ndryshe, në media është raportuar edhe për një plasaritje ndërmjet Aliut e Durmishit, të cilat raportime i kanë mohuar në deklarimet e tyre publike.
Kujtojmë që kryeministri Albin Kurti ende nuk është deklaruar për aferën “Jaranat e Liburnit”, ku dëgjohen dajallarët e Ramqajt duke kërkuar ryshfet.