Ish-shefi i grupit parlamentar të Partisë Demokratike të Kosovës, Adem Grabovci, është dënuar nga Gjykata e Apelit me 1 vjet e dy muaj burgim, i cili nuk ekzekutohet nëse nuk kryen ndonjë vepër tjetër penale në kohëzgjatje prej 2 vjetësh, për rastin e përgjimeve “Pronto”.

Gjykata e shkallës së dytë përmes një kumtesë për media ka njoftuar se Grabovcit i është hequr e drejta për t’u zgjedhur dhe i është ndaluar ushtrimi i funksioneve në administratën publike për 2 vitet e ardhshme.

“A.G., i është shqiptuar dënim unik prej 1 vjet e 2 muaj burgim, dënim i cili nuk do të ekzekutohet në rast se ai nuk kryen vepër tjetër penale, në kohëzgjatje pre 2 viteve. Atij i është hequr e drejta për t’u zgjedhur dhe i është ndaluar ushtrimi i funksioneve ne administratën publike apo shërbimin publik, në kohëzgjatje në kohëzgjatje prej 2 viteve, pas kalimit te periudhës se verifikimit te dënimit me kusht”, thuhet në komunikatë.

Grabovci po gjykohet për përgjimet e EULEX-it, të cilat dolën për herë të parë në media në vitin 2011. Ai në ato biseda dëgjohej duke biseduar me presidentin aktual të Kosovës, Hashim Thaçin, ish-kryparlamentarin, Kadri Veseli dhe figura të tjera politike, kryesisht bashkëpartiakë të tij nga PDK-ja. Me ta, ish-shefi i grupit parlamentar të PDK-së bisedonte për punësimin e personave të afërt me PDK-në në institucione të ndryshme shtetërore, ndërmarrje e agjenci publike.

Grabovci në atë kohë ishte duke u hetuar nga ana e EULEX-it për vepra korruptive në cilësinë e zëvendësministrit të Ministrisë së Transportit dhe Telekomunikacionit, mirëpo këto hetime ndaj tij u mbyllen në mungesë të provave./Gazeta Sinjali/