Pas tragjedisë me 279 viktima në Ahmedabad, një tjetër incident ka ndodhur me një avion të kompanisë Air India. Fluturimi AI315, me itinerar Hong Kong – Delhi, është detyruar të kthehet në aeroportin e nisjes pas raportimit të një problemi teknik nga piloti gjatë fluturimit.
Avioni Boeing 787-8 Dreamliner, i njëjtë me modelin që u përplas në Ahmedabad katër ditë më parë, u ul në mënyrë të sigurt dhe të gjithë pasagjerët u evakuuan sipas protokolleve të sigurisë.
Fluturimi ishte nisur nga Hong Kongu në orën 12:00 me kohën lokale dhe ishte planifikuar të mbërrinte në Delhi në orën 12:20 me orën indiane. Pas ndalimit të fluturimit, avioni tani është në inspektim të detajuar nga autoritetet teknike për të verifikuar shkakun e problemit.
Ky incident i radhës ndodhi vetëm disa ditë pas tragjedisë që përfshiu fluturimin AI171, i cili u rrëzua mbi një ndërtesë banimi për mjekë në Ahmedabad, duke shkaktuar vdekjen e të paktën 279 personave. Vetëm një pasagjer arriti të mbijetojë, një ngjarje që është cilësuar si një “mrekulli”. Hetimet për aksidentin e AI171 vazhdojnë dhe tashmë është gjetur edhe kutia e zezë e dytë, e cila pritet të zbulojë të dhëna të rëndësishme për shkaqet e rrëzimit.
Një video e re, që sipas ekspertëve të aviacionit mund të jetë vendimtare, tregon se pozicioni i krahëve mund të ketë ndikuar në humbjen e lartësisë gjatë ngritjes. Po ashtu, është spekuluar se shkaku mund të ketë qenë një gabim njerëzor i bashkëpilotit, por edhe mundësia e një përplasjeje me zog është në hetim.
Ekspertët gjithashtu po analizojnë mundësinë e defekteve teknike ose problemeve strukturore në dizajnin kompleks të Boeing 787 Dreamliner, çka mund të kërkojë muaj hetimesh për ta konfirmuar këtë mundësi.
Sinjali – aty ku e vërteta flet para lajmit!