Komuna e Ferizajt është në mesin e katër komunave që u janë vendosur masa nga Qeveria e Kosovës për shkak të rritjes së numrit të rasteve me COVID-19.
Nga sot në orën 21:00 është ndaluar lëvizja e qytetarëve dhe janë mbyllur të gjitha bizneset deri në orën 05:00 të mëngjesit.
Gazeta Sinjali ka raportuar për mosrespektimin e këtyre masave me anë të disa videove ku shihen shumë vetura dhe këmbësorë në qytet.
Ndërsa, Komuna e Ferizajt përmes një postimi në Facebook, ka thënë se po respektohen maksimalisht.
“Vendimi për mbylljen e veprimtarive të ndryshme e kufizimi i lëvizjes po respektohet maksimalisht në Ferizaj Me të marr vendimin Qeveria e Republikës së Kosovës, me ç’rast nga katër komuna, edhe në Ferizaj mori vendim që të kufizohet qarkullimi i qytetarëve si dhe të mbyllet veprimtaria e gastronomisë e të tjera pas orës 21:00, Inspektorati i Komunës bashkë me Policinë e Kosovës në Ferizaj, nisën sot aksionin për kontrollin e shtuar në zbatim të këtij vendimi”, thuhet në njoftimin e tyre.
Në njoftim thuhet se po respektohen në përpikëri masat e vendosura nga Qeveria e Kosovës.
“Nga raportimet e terrenit, të gjitha ndalesat, kufizimet e veprimtarive dhe lëvizja e qytetarëve të parapara në vendimin e Qeverisë qendrore po zbatohen në përpikëri. Inspektorët janë vazhdueshëm e do të jenë gjatë gjithë kohës në terren në zbatim të këtij vendimi, shoqëruar edhe nga Policia e Kosovës, që të garantohet respektimi i kësaj mase në mbrojtje të shëndetit publik gjatë pandemisë së virusit COVID-19”, thuhet në njoftim.
Ferizaji është në mesin e qyteteve që kanë pësuar rritje të numrit të të infektuarve me koromavirus./Gazeta Sinjali/