Ish-komandanti i Ushtrisë Çlirimtare të Kosovës Agim Çeku, tha për Gazetën Sinjali se vendimi i Gjykatës Themelore që i shpalli të pafajshëm të akuzuarit për rastin “Veteranët”, ka qenë i pritur nga ai, shkruan Gazeta Sinjali.

“Vendim i pritur, vendim i drejtë. Është konfirmuar ajo që kam thënë ditën e parë që jam plotësisht i pafajshëm”, tha Çeku.

Gazeta Sinjali ka kontaktuar edhe me ushtruesin e detyrës së kryetarit të Organizatës së Veteranëve të Luftës së Ushtirisë Çlimtare të Kosovës, Faton Klinaku, por ky i fundit nuk ka dashur të komentojë për këtë çështje.

“Është çështje e drejtësisë ”, tha shkurt Klinaku.

Sinjali ka tentuar të flasë edhe me disa nga të liruarit nga akuzat, por kontakti me ta ka qenë i pamundur.

Të akuzuar ishin Agim Çeku, Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj dhe Xhavit Jashari.

Të gjithë këta ishin anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës.

Më herët Prokuroria Speciale pati njoftuar se janë rreth 19 mijë persona që nuk i plotësonin kriteret për t’u futur në listën e veteranëve.

E Prokuroria Speciale kishte pretenduar se nga provat e siguruara është vërtetuar se nga pagesat e kundërligjshme për veteranët luftëtarë të UÇK-së, buxheti i Kosovës është dëmtuar në shumën prej  88,769,217.04 euro. /Gazeta Sinjali/