Ministri i Kulturës, Rinisë dhe Sportit, Hajrulla Çeku ka deklaruar se nuk janë ndërprerë kontaktet me organizatorët e festivalit “Sunny Hill” dhe se janë të gatshëm që të diskutohet edhe më tej, shfrytëzimi i tokës ku është paraparë mbajtja e festivalit, i cili nis më 4 dhe përfundon më 7 gusht.
Sipas ministrit Çeku, i cili u shpreh i zhgënjyer, kjo çështje ka marrë dimension të panevojshëm politik, shkruan Gazeta Sinjali.
“Unë kam thënë që në parim çështja e ndarjes së tokës për një periudhë kaq të gjatë, nuk duhet të bëhet në ngut ose të ndonjë lloj presioni vendimmarrje të bazuar, që në fund të matim dhe ta vlerësojmë në mënyrën e duhur interesin publik dhe aty ku ka interesa private në raste të caktuara”, është shprehur ministri Çeku.
Ai tutje shtoi se ishin në komunikim me organizatorët e festivalit të “Sunny Hill” dhe si MKRS iu kanë ofruar që të shërbejnë si pikë referente, për të gjithë ministritë që ata kanë punë.
Ministri Çeku ka mohuar, të ketë pasur Qeveria e Kosovës propozim për çështjen afatgjate të shfrytëzimit të tokës, por shtoi se kanë kërkuar që të ulen dhe të gjejnë zgjidhjen më të mirë.
“Nuk do të duhej të ishte shkas, as ndonjë arsyeje e mjaftueshme një çështje të cilën kemi thënë ta ri mendojmë, çështjen afatgjate të marrjes së asaj toke. Për ta bërë një lëvizje kaq të shpejtë, sepse vetëm para disa ditësh ne ishim duke diskutuar këtë çështje me ta. Dhe u duk se kishte një pranim për ta rimenduar për çështjen afatgjate të kontratës së kësaj toke. Dhe kaluan shumë pak ditë dhe ndodhi kjo që u paralajmërua dje“, ka deklaruar ai.
Sipas tij, organizimi i kësaj natyre është më i madh se të gjithë ne, sepse është për vendin tonë, e që lidhet me promovim ndërkombëtar.
“Nuk besoj që duhet të reduktohet në çështje të vogla ose të bëhet çështje e debateve politike. Jam thellësisht i zhgënjyer që po merr edhe një dimension politik të panevojshëm“, tha Çeku.
Tutje ai tha se duhet të vazhdojnë të insistojnë si qeveri, që ta mbrojnë imazhin e këngëtares Dua Lipa.
“Duhet të vazhdojnë të insistojmë si qeveri, si institucione, si shoqëri, si Kosovë që pikë së pari ta mbrojmë figurën e Dua Lipës. Një personaliteti të veçantë për vendin tonë që ka bërë shumë dhe ka kontribuar shumë për Kosovën. Ta shmangim çfarëdo politizimi ose të përfshirjes së emrit të saj në debatet politike dhe dua ta rikonfirmoj gatishmërinë edhe të ministrisë që drejtoj, por edhe për shkak të komunikimit me qeverinë, që jemi shumë të interesuar ta vazhdojmë bashkëpunimin“, u shpreh ministri Çeku.
Ai po ashtu tha se jemi të gatshëm, që t’i qëndrojmë prapa zotimeve tona që t’iu plotësojmë të gjitha kërkesat.
Sipas tij, janë të gatshëm që të diskutojnë edhe më tej çështjen e ndarjes së parcelës së kërkuar për organizimin e këtij festivali.
“Sunny Hill”, do të zhvendoset në Tiranë, për shkak të vonesave të shumta administrative për lokacionin.
