Katër persona kanë mbetur të lënduar në një aksident trafiku që ka ndodhur sot në fshatin Paravollë të komunës së Novobërdës, ku janë përfshirë dy vetura.
Pamje nga vendi i ngjarjes janë dërguar nga lexuesit e Sinjalit, ku shihet se automjetet kanë pësuar dëme materiale pas përplasjes dhe se në zonë është intervenuar nga ekipet emergjente.
Lajmi është konfirmuar për Sinjalin nga zëdhënësi i Policisë për rajonin e Gjilanit, Ismet Hashani, i cili ka bërë të ditur se menjëherë pas raportimit, në vendngjarje kanë dalë njësitet e trafikut rajonal, zjarrfikësit dhe ekipi i ndihmës së parë.
Sipas tij, të lënduarit kanë marrë ndihmën e parë në vendin e ngjarjes dhe më pas janë transportuar për trajtim të mëtejshëm në Qendrën Emergjente në Gjilan.
“Ju njoftoj se sot në orën 15:20 kemi pranuar informatën për një aksident trafiku në fshatin Parallovë, Komuna Novobërdë. Njësitet kompetente kanë dalë në vendngjarje dhe nga hetimet e para bëhet e ditur se janë përfshirë dy vetura dhe katër persona kanë mbetur të lënduar,” thuhet në konfirmimin e Policisë së Kosovës.
Policia ka nisur hetimet për të sqaruar rrethanat dhe shkaqet e aksidentit.
Sinjali – aty ku e vërteta flet para lajmit!