Fillimit të vitit të ri shkollor dhe përcjelljes së fëmijëve për në bankat shkollore, nuk kanë mundur t’i rrezistojnë as politikanët kosovarë.

Si edhe shumica e qytetarëve të Kosovës as ata nuk janë përmbajtur, dhe në llogaritë ë tyre në rrjetet sociale, kanë publikuar fotografi e shkrime me urimet më të mira për fëmijët e tyre në vitin e ri shkollor.

Paraditen e sotme kryeministri i vendit në detyrë, Ramush Haradinaj, në profilin e tij në Facebook, kishte publikuar fotografi me bashkëshorten e tij Anitën dhe djalin e tyre të madh, Gjinin, i cili kishte nisur mësimin si gjimnazist në njërën nga shkollat e mesme private të vendit, Gjimnazin “Loyola”, i cili konsiderohet nga shkollat më të mira të vendit dhe më të shtrenjtat natyrisht.

Por për dallim nga Haradinaj ish-zëvendësi i tij në qeveri, Behgjet Pacolli, ka treguar, se si ai edhe përkundër pasurisë së madhe që e posedon, ka vendosur fëmijët t’i dërgoj në shkollë publike.

Pacolli në një shkrim në profilin e tij në Facebook ka thënë se u ka mësuar fëmijëve të tij se të gjithë njerëzit janë njësoj.

“Si për shumë fëmijë të tjerë, sot është fillimi i shkollës edhe për fëmijët e mi, të cilët janë duke u shkolluar në shkolla publike e jo në ato private siç preferojnë të tjerët. Unë u kam mësuar atyre që të gjithë njerëzit janë njësoj. I uroj të gjithë fëmijëve dhe të rinjëve një vit të suksesshëm arsimor”, ka shkruar Pacolli në Facebook.

Ndryshe në shumicën e shkollave të vendit sot ka nisur viti i ri shkollor.