Pacientët e Klinikës së Gjinekologjisë në Qendrën Klinike Universitare të Kosovës janë ankuar për vonesa në marrjen e shërbimeve dhe sjellje negative nga ana e mjekëve, shkruan Gazeta Sinjali.

Një paciente ka thënë për Gazetën Sinjali se mjekët e kësaj klinike kanë qëndruar në pauzë nga ora 09:55 deri në orën 11:38.

Pacientja ka pyetur mantilbardhët se kur përfundon pauza dhe ata dëgjohen teksa i thonë në orën 11:00, ndonëse në derën e zyrës së stafit shkruante se pauza fillon në orën 10:00 dhe përfundon në orën 10:30.

Gjatë gati dy orëve sa pacientët kanë pritur në korridorin e kësaj klinike, kjo paciente thotë se edhe pacientët e tjerë kanë filluar të nervozohen dhe të bërtasin.

Megjithëse më pas i kanë marrë shërbimet për të cilat kanë shkuar, kjo paciente thotë se sjellja e mjekëve dhe mamive ka qenë shumë negative.

Lidhur me këtë rast Gazeta Sinjali ka kontaktuar edhe me drejtorin e kësaj klinike, Jakup Ismailin, i cili tha se ka biseduar me mamitë dhe mjekët për ankesën e pacientes në fjalë.

Ismaili ka thënë se gjinekologia që ka qenë në ndërrim është vonuar për shkak të një lindjeje të komplikuar që ka kryer me operacion dhe e cila ka zgjatë më shumë.

Ndërkaq për mamitë që kanë pauzuar për gati dy orë thotë se nuk mund t’i kontrollojnë pacientët pa prezencën e mjekut përgjegjëse që në këtë rast, sipas tij, ka qenë e zënë në një lindje të komplikuar.

“Një doktoreshë sot ka qenë në ndërrim. Është vonuar për shkak se lindja ka qenë e komplikuar, ka zgjatë pak më shumë. Mamitë kanë qëndru në zyre sepse kanë qenë duke e pritur doktorin derisa ka ardhë, ato motrat nuk e kontrollojë.”

“Ato janë në shërbim të mjekut, do të thotë ndihmëse. Mirëpo, doktoresha që ka qenë në orar në atë kohë e ka pasë një lindje të komplikuar me operacion që ka zgjatë pak më shumë. Në 11:30, pasi që e ka kry lindjen, doktoresha ka ardhë. Veç një paciente është anku”, tha Ismaili për Sinjali./Gazeta Sinjali/