Për shkak të pandemisë që përfshiu edhe vendin tonë, pas më shumë se dy muajsh prej kur Qendra e Studentëve është kthyer në karantinë për personat e ardhur nga jashtë, nga data 18 maj me vendim të Ministrisë së Shëndetësisë studentëve në Kosovë u është lejuar të shkojnë për t’i marrë gjërat që i kanë lënë në dhomat e tyre.
Por, një gjë e tillë nuk i’u mundësua studentëve banues të këtyre konvikteve të cilët jetojnë jashtë kufijve të vendit, shkruan Gazeta Sinjali.
Organizata “Paqja Studentore” u ka bërë thirrje institucioneve të vendit, që në mënyrë të koordinuar të bëjnë planin e pranimit të studentëve që vijnë nga jashtë Kosovës, duke mos i dëmtuar dhe duke i trajtuar në të njëjtën mënyrë sikurse studentët kosovarë.
“Paqja Studentore u kërkon institucioneve të Republikës së Kosovës, përkatësisht Ministrisë së Jashtme, Ministrisë së Punëve të Brendshme, Ministrisë së Shëndetësisë, MAShTI-t, Universitetit të Prishtinës dhe Qendrës së Studentëve, që në mënyrë të koordinuar të bëjnë planin e pranimit të studentëve që vijnë nga jashtë Kosovës, duke mos i dëmtuar dhe duke i trajtuar në të njëjtën mënyrë sikurse studentët kosovarë”, thuhet në njoftimin e tyre.
Paqja Studentore u drejtohet institucioneve me këtë kërkesë:
1. Studentëve që vijnë nga jashtë Kosovës t’u lejohet hyrja në Republikën e Kosovës më së voni deri më 5 qershor
2. Të mos karantinohen studentët që hyjnë në Republikën e Kosovës
3. Të mos përdoret ndonjë lloj reciprociteti i mundshëm me Serbinë, që dëmton studentët e Luginës së Preshevës
4. Të formohet një orar i veçantë nga Qendra e Studentëve për tërheqjen e gjësendeve të studentëve që jetojnë jashtë Kosovës./GazetaSinjali/