Të paktën 67 palestinezë janë zhvendosur gjatë këtij muaji si pasojë e shembjeve të ndërtesave në Bregun Perëndimor të pushtuar, ndërsa janë rrënuar rreth dy duzina objekte, sipas të dhënave të Zyrës së Kombeve të Bashkuara për Koordinimin e Çështjeve Humanitare (OCHA).
Sipas OCHA-s, autoritetet izraelite i kanë shembur këto struktura me arsyetimin se ato nuk posedojnë leje ndërtimi, të cilat, sipas organizatës, janë “pothuajse të pamundura për t’u siguruar nga palestinezët”.
OKB-ja ka bërë të ditur se sulmet nga kolonët izraelitë dhe shembjet për shkak të mungesës së lejeve të ndërtimit gjatë këtij viti kanë detyruar të largohen nga shtëpitë e tyre më shumë se 3 mijë e 200 palestinezë.
OCHA ka theksuar se kjo përbën një mesatare prej rreth 17 personash të zhvendosur çdo ditë, që është dyfish më e lartë krahasuar me normën mesatare ditore gjatë tre viteve të mëparshme.
Situata në Bregun Perëndimor mbetet një nga çështjet më të ndjeshme në konfliktin izraelito-palestinez, me rritje të tensioneve dhe përplasjeve mes komuniteteve palestineze, kolonëve izraelitë dhe forcave të sigurisë.
Sinjali – aty ku e vërteta flet para lajmit!