Vala e fuqishme e të nxehtit që ka përfshirë Evropën gjatë ditëve të fundit po shkakton pasoja të rënda për shëndetin publik. Organizata Botërore e Shëndetësisë (OBSH) ka bërë të ditur se që nga 21 qershori janë regjistruar mbi 1,300 vdekje të lidhura me temperaturat ekstreme në vende të ndryshme të kontinentit.
Drejtori i përgjithshëm i OBSH-së, Tedros Adhanom Ghebreyesus, paralajmëroi se nxehtësia ekstreme mbetet një nga rreziqet më të mëdha për shëndetin, duke e cilësuar stresin nga temperaturat e larta si një “vrasës të heshtur”. Sipas tij, shumë ndërtesa, shkolla dhe ambiente pune në Evropë nuk janë projektuar për temperatura kaq të larta.
Situata është veçanërisht shqetësuese në Francë, ku autoritetet shëndetësore raportojnë rreth 1,000 vdekje më shumë se mesatarja e zakonshme gjatë ditëve të fundit. Viktimat janë kryesisht persona mbi moshën 65-vjeçare, ndërsa është vërejtur edhe një rritje e ndjeshme e rasteve të vdekjeve në banesa.
Ndërkohë, temperaturat rekord vazhdojnë të regjistrohen në disa shtete evropiane. Gjermania ka shënuar deri në 41.7 gradë Celsius, Republika Çeke 41.1 gradë, ndërsa Polonia ka regjistruar një rekord të ri kombëtar me 40.5 gradë Celsius.
OBSH rikujton se Evropa është kontinenti që po ngrohet më shpejt në botë, me një ritëm afërsisht dy herë më të lartë se mesatarja globale. Institucioni u bën thirrje qytetarëve dhe autoriteteve të marrin masa mbrojtëse për të reduktuar rrezikun nga temperaturat ekstreme, veçanërisht për grupet më të cenueshme të popullsisë.
Sinjali – aty ku e vërteta flet para lajmit!