Pas rifillimit të punës në Aeroportin Ndërkombëtar të Prishtinës “Adem Jashari”, janë publikuar edhe udhëzimet që duhet t’u përmbahen personat që udhëtojnë përmes këtij aeroporti.

Në mesin e tyre, thuhet se vetëm udhëtarët lejohen të hyjnë në ndërtesën e terminalit. Kurse, ata që shoqërojnë udhëtarët në nisje dhe në pritje të tyre, nuk lejohet të hyjnë në hapësirat e terminalit.

Sipas Institutit Kombëtar të Shëndetit Publik, qytetarët duhet të mbajnë distancën fizike e po ashtu edhe maska.

Por, si duket ata që po presin para aeroportit, nuk po i zbatojnë rekomandimet e IKSHPK-së.

Në disa fotografi që i kanë dërguar sinjalizuesit shihet se është një numër i madh i qytetarëve para terminalit, të cilët nuk po mbajnë as maska e as distancë fizike. /GazetaSinjali/