Kompania Rajonale e Ujësjellësit “Prishtina” ka njoftuar se nuk ka pranuar asnjë kërkesë zyrtare nga Qeveria e Kosovës për mospagesë të shpenzimeve të ujit nga qytetarët.

Përmes një komunikate për media, kjo kompani kërkon nga qytetarët që të vazhdojnë të bëjnë pagesat për shpenzimet e tyre të ujit.

KRU “Prishtina” thotë se është krijuar dilemë te qytetarët pas disa deklaratave, sipas tyre, jozyrtare dhe nga persona jokompetentë, lidhur me pezullimin e pagesave gjatë kohës së pandemisë.

“Deri më tash, Ujësjellësi Rajonal “Prishtina” nuk ka asnjë kërkesë zyrtare nga Qeveria e Republikës së Kosovës për mospagesë të shpenzimeve të ujit nga qytetarët. Si rrjedhojë, kërkojmë nga ju që të vazhdoni të bëni pagesën e shpenzimit të ujit ngase këto do të i ndihmonit Ujësjellësit Prishtina që të ketë një likuiditet financiar dhe të vazhdojë të punojë për një furnizim të rregullt me ujë të pijshëm për të gjithë konsumatorët në zonën e shërbimit”, thuhet në komunikatë.

Tutje, KRU “Prishtina” njofton se ka bërë disa rregullime në sistemin elektronik të pagesave ku secili konsumator mund të qaset përmes E-banking dhe të bëjë pagesën e faturës së ujit dhe kanalizimit dhe se janë në konsultim me Postën e Kosovës, e cila do të ofrojë mundësinë që pagesat e ujit të bëhen edhe përmes arkave mobile.

Ato do të vendosen në secilën komunë për ata konsumatorë të cilët nuk mund të kenë qasje në sistemin elektronik të pagesave për arsye të ndryshme./Gazeta Sinjali/