Të paktën një person ka humbur jetën dhe nëntë të tjerë janë plagosur pas një sulmi ajror rus në qytetin e Kharkivit, në verilindje të Ukrainës.
Sipas autoriteteve lokale, bombardimet kanë goditur një zonë banimi të qytetit, duke shkaktuar dëme të konsiderueshme në ndërtesat e banimit. Kryebashkiaku i Kharkivit ka bërë të ditur se gjatë operacioneve të kërkim-shpëtimit, ekipet e emergjencës kanë gjetur trupin e një burri nën rrënojat e një ndërtese të shkatërruar.
Autoritetet ukrainase kanë raportuar gjithashtu se të paktën nëntë persona kanë mbetur të plagosur nga sulmi, ndërsa ekipet e shpëtimit kanë vazhduar punën për kontrollimin e zonës së goditur.
Ndërkohë, Ministria ruse e Mbrojtjes ka njoftuar se sistemet e saj të mbrojtjes ajrore kanë rrëzuar 187 dronë ukrainas gjatë natës në rajone të ndryshme të vendit, përfshirë edhe rajonin e Moskës.
Sulmet e ndërsjella mes Rusisë dhe Ukrainës vazhdojnë të shkaktojnë viktima dhe dëme në të dyja vendet, ndërsa lufta e nisur në vitin 2022 mbetet pa një zgjidhje të afërt diplomatike.
Sinjali – aty ku e vërteta flet para lajmit!