Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhunë psikike e fizike nga bashkëshortët e tyre, por edhe anëtarët tjerë të familjes, raporton Gazeta Sinjali.
Një rast i tillë ka ndodh edhe në një fshat të Malishevës.
Burimet e Gazetës Sinjali kanë bërë me dije se viktima e ka lajmëruar Policinë për dhunën që ka përjetuar nga bashkëjetuesi i saj.
Ajo ka raportuar se është dhunuar fizikisht dhe psikikisht gjatë një fjalosjeje të ndodhur gjatë udhëtimit nga Prishtina në Pejë, kur i dyshuari e ka detyruar të zbresë nga vetura.
Viktima ka theksuar se dhuna psikike dhe fizike ishte ushtruar edhe më parë nga i dyshuari, dy herë gjatë muajit të fundit.
Rasti është trajtuar nga hetuesit e dhunës në familje dhe në lidhje me këtë ngjarje është informuar edhe Prokurori.
Hetimet për rastin janë duke vazhduar.