Kryeministri izraelit, Benjamin Netanyahu, ka deklaruar se Izraeli nuk do të tërhiqet nga jugu i Libanit, pavarësisht marrëveshjes së armëpushimit të arritur mes Shteteve të Bashkuara dhe Iranit.
Në deklaratën e tij të parë publike pas prezantimit të tekstit të marrëveshjes SHBA-Iran, Netanyahu theksoi se prioritet mbetet garantimi i sigurisë në veri të Izraelit.
“Ne do ta rikthejmë sigurinë në veri”, tha Netanyahu.
“Kjo kërkon ruajtjen e zonës së sigurisë në jug të Libanit dhe kërkon që ne të mos largohemi prej saj për aq kohë sa kërkesat e sigurisë së Izraelit e kërkojnë këtë”, shtoi ai.
Ndërkohë, qeveritë e Izraelit dhe Libanit po përgatiten për një raund të ri bisedimesh diplomatike në Uashington javën e ardhshme, raportoi CNN.
Pika e parë e marrëveshjes SHBA-Iran parashikon “ndërprerjen e menjëhershme dhe të përhershme të operacioneve ushtarake në të gjitha frontet, përfshirë Libanin”. Megjithatë, Izraeli ka vazhduar sulmet në jug të Libanit, duke pretenduar se po godet objektiva të Hezbollahut, grupit militant të mbështetur nga Irani.
Sipas Agjencisë Kombëtare të Lajmeve të Libanit, një sulm izraelit me dron në qytetin Kfar Tebnit vrau tre persona të enjten në mëngjes. Ministria libaneze e Shëndetësisë Publike ka bërë të ditur se sulmet izraelite kanë shkaktuar mbi 3.900 viktima që nga fillimi i luftës me Iranin.
Nga ana tjetër, Hezbollahu ka vazhduar sulmet me raketa dhe dronë ndaj forcave izraelite në jug të Libanit, duke vrarë një ushtar izraelit të mërkurën.
Sipas një zyrtari izraelit, bisedimet e ardhshme mes Izraelit dhe Libanit, të planifikuara për periudhën 23-25 qershor në Uashington, do të përfshijnë ambasadorët e të dy vendeve, si dhe diskutime në nivel ushtarak.
Sinjali – aty ku e vërteta flet para lajmit!