Policia në Prizren gjeti dhe sekuestroi dy armë në pronësi ilegale, shkruan Gazeta Sinjali.

Në rastin e parë zyrtarët patrullues ndaluan një automjet për kontroll në rrugën Prizren-Vërmicë, dhe gjatë kontrollit policët gjetën në pronësi ilegale një armë të tipit revole Bereta si dhe 16 fishekë kalibër 9mm.

Me këtë rast u procedua penalisht i dyshimti D.K. i lindur në vitin 1995, dhe siç njofton Policia në Prizren, rasti po vazhdon të hetohet në procedurë të rregullt.

Në rastin e dytë patrulla policore u informua se në rrugën “Wesli Clark”, në Prizren, një person i dyshimtë kishte kanosur një qytetar duke ja drejtuar armën e mbushur.

“I dyshimti u arrestua nga Njësia e Reagimit të Shpejtë të Policisë, ku gjatë kontrollimit iu gjet një armë e tipit revole dhe 6 fishekë të cilët i posedonte i dyshimti”, thuhet në raport.

Përveç kanosjes dhe mbajtjes ilegale të armës i njëjti rezultonte edhe nën ndikim të alkoolit me 1.61 promil.

“Pasi u informua prokurori i Shtetit i dyshimti R.B. i lindur në vitin 1982 u ndalua në mbajtje në afat prej 48 orësh. Me rastin po merren njësia e hetimeve në Prizren”, njofton tutje Policia. /Gazeta Sinjali/