Aktorja e njohur irlandeze Brenda Fricker ka ndërruar jetë në moshën 81-vjeçare, duke lënë pas një karrierë të pasur në film, televizion dhe teatër.
Fricker fitoi çmimin Oscar për aktoren më të mirë në rol dytësor në vitin 1990 për interpretimin e nënës së personazhit të luajtur nga Daniel Day-Lewis në filmin e mirënjohur “My Left Foot”.
Ajo u bë e njohur gjithashtu për publikun televiziv me rolin e infermieres Megan Roach në serialin e BBC-së “Casualty”, ku u shfaq për herë të parë në vitin 1986 dhe për herë të fundit në vitin 2010.
Një nga rolet e saj më të paharrueshme mbetet ai i gruas së pastrehë, e njohur si “Pëllumbesha e Central Parkut”, në filmin “Home Alone 2: Lost in New York” të vitit 1992.
Lajmi për vdekjen e saj u konfirmua nga agjenti Phil Belfield, i cili e kujtoi me fjalë prekëse.
“Nuk do ta shohim më kurrë si më parë dhe bota është më e vogël për shkak të mungesës së saj”, tha ai.
Ai shtoi: “Ishte nder që e njihja, e doja dhe punoja me të dhe ajo gjithmonë do të ketë një vend në zemrën time dhe në zemrën e kaq shumë fansave të filmit dhe televizionit në të gjithë botën.”
E lindur në Dublin, Fricker e nisi karrierën e saj artistike në televizion dhe teatër. Ajo interpretoi në prodhime të njohura si telenovela e parë irlandeze “Tolka Row” në vitet 1960, “Coronation Street” në vitin 1977 dhe “Licking Hitler, a Play For Today”, shkruar nga David Hare, në vitin 1978.
Në vitin 1990, ajo hyri në histori duke u bërë aktorja e parë irlandeze që fitoi një çmim Oscar, duke triumfuar përballë emrave të njohur të Hollivudit, si Julia Roberts dhe Anjelica Huston.
Filmi “My Left Foot” rrëfente historinë e vërtetë të Christy Brown, një irlandez i lindur me paralizë cerebrale, i cili mund të kontrollonte vetëm këmbën e majtë. Në këtë film, Daniel Day-Lewis fitoi gjithashtu çmimin Oscar për rolin kryesor.
Përveç “Home Alone 2”, Fricker la gjurmë edhe në filma të tjerë të njohur, si “So I Married An Axe Murderer” (1993), “Angels In The Outfield” (1994), “A Time To Kill” (1996) dhe “Veronica Guerin” (2003).
Sinjali – aty ku e vërteta flet para lajmit!
