Ka ndërruar jetë infermierja e Qendrës Klinike Universitare të Kosovës, Rukije Uka – Grajqevci, raporton Gazeta Sinjali.
Lajmi është bërë i ditur nga familjarët e saj, e një reagim për vdekjen e saj ka ardhur edhe nga Shërbimi Spitalor Klinik dhe Universitar i Kosovës.
Në postimin e SHSKUK-së në Facebook thuhet se Rukije Uka – Grajqevci për më shumë se 20 vite ka shërbyer me përkushtim dhe profesionalizëm në Klinikën e Anesteziologjisë dhe Mjekimit Intensiv, duke dhënë kontribut të çmuar në sallën operative të Klinikës Obsetrike – Gjinekologjike.
“Ajo do të mbahet mend jo vetëm për aftësitë e saj të shkëlqyera profesionale, por mbi të gjitha, për humanizmin e saj të jashtëzakonshëm dhe kujdesin që shfaqte ndaj çdo pacienti. Ishte shembull i vërtetë i dedikimit dhe dashurisë për profesionin e shenjtë të infermieres, duke u ndihmuar shumë grave, me profesionalizmin dhe përkushtimin e saj”, shkruhet mes tjerash në postim.
Ndërkaq, familjarët e të ndjerës kanë njoftuar se varrimi i saj do të bëhet sot në orën 14:00.