Çështja e zgjedhjes së presidentit të ri të Kosovës, pas dorëheqjes së Hashim Thaçit nga kjo pozitë është një temë e ‘nxehtë’ që po diskutohet si në publik ashtu edhe nga partitë politike në vend. Emri më i përfolur për president jo vetëm këto ditë por edhe më parë është Murat Jashari, nipi i komandantit Adem Jashari, shkruan Gazeta Sinjali.
Murat Jashari është përmendur mbrëmë edhe nga kryetari i Skënderajt, Bekim Jashari, si i duhuri për pozitën e Presidentit të vendit.
Gazeta Sinjali e ka kontaktuar Murat Jasharin për ta pyetur se si i sheh këto diskutime për çështjen e Presidentit, të cilën ai e ka quajtur si një çështje madhore për vendin.
“Pozita e presidentit është një çështje kaq madhore dhe e ndjeshme për shoqërinë tonë por në këto momente nuk mundem të prononcohem për shkaqe objektive. Fjala publike ka peshë të madhe dhe mendoj se njeriu duhet të jetë shumë i kujdesshëm në komunikim me opinionin”, tha Jashari për Sinjalin.
Bekim Jashari mbrëmë në një televizion tha se “më i miri për këtë pozitë është Murati. Nëse 2/3 bien dakord për, atëherë adresa është Murati”.
Përveç Bekim Jasharit, edhe kryetari i Nismës, Fatmir Limaj ka thënë se e përkrahin fuqishëm idenë që Murat Jashari të zgjidhet president.
“Është zgjidhje e mirë. Në këtë moment është zgjidhja më e mirë e mundshme. Kjo do të ishte zgjidhja më adekuate, nëse arrijmë ta gjejmë një konsensus”, është shprehur Limaj.
Aleanca për Ardhmërinë e Kosovës pretendon se në postin e presidentit duhet të jetë lideri i saj Ramush Haradinaj.
Përveç Ramush Haradinajt, edhe lideri i LDK-së, Isa Mustafa, ka nxjerrë argumente lidhur me çështjen e zgjedhjes së presidentit, përmes studiove televizive. Në këtë debat është përfshirë edhe subjekti opozitar, Partia Demokratike e Kosovës, i cili ka bërë të ditur që në rast se kërkohen votat e tij për zgjedhjen e presidentit të vendit, atëherë emri i presidentit duhet të propozohet nga kjo parti.