Si rezultat i gjendjes së rënduar me shëndetin e prokurorëve e stafit tjetër për shkak të mungesës së ajrit në Pallatin e Drejtësisë, Ministria e Punëve të Brendshme ka angazhuar një kompani për hapjen e dritareve aty ku është e nevojshme.
Nga Zyra për media e Ministrisë së Punëve të Brendshme, tregojnë për Gazetën Sinjali se është nënshkruar kontrata për hapje të dritareve aty ku është e nevojshme dhe në bazë të kontratës është angazhuar një kompani që do të merret me hapjen e tyre.
Gazeta Sinjali ka raportuar se të enjten e kaluar derisa ishte duke punuar në zyrën e tij në Pallatin e Drejtësisë, Kryeprokurori i Prokurorisë Themelore të Prishtinës Kujtim Munishi, ka pasur arrest kardiak.
“Përkeqësimi i gjendjes shëndetësore ka ardhur si rezultat i mungesës së ajrit apo oksigjenit në zyrën time në Pallatin e Drejtësisë, ku edhe pata arrest kardiak”, ka thënë Kryprokurori Kujtim Munishi për Sinjalin.
E në mbledhjen e 220-të i Këshillit Prokurorial është ngritur shqetësimi se stafi i prokurorisë çdo ditë po rrezikohet nga gjendja në Pallatin e Drejtësisë si pasojë e mungesës së ajrit.
Të gjendur para kësaj situate, KPK-ja i kanë bërë thirrje Ministrisë së Punëve të Brendshme që të implementojnë sa më shpejtë kontratën për hapjen e dritareve në këtë objekt.
Këshilli Prokurorial ka marrë vendim për reduktimin esencial të aktiviteteve të punës në Objektin C të Pallatit të Drejtësisë, aty ku janë të vendosura Prokuroria e Apelit dhe Prokuroria Themelore e Prishtinës.
Sipas KPK-së ky reduktim në këto dy prokurori vjen si rezultat i gjendjes së renduar në këtë objekt, si pasojë e mungesës së theksuar të oksigjenit dhe problemeve shëndetësore të shfaqura në baza ditore tek prokurorët dhe stafi mbështetës i këtyre dy prokurorive.