Misioni amerikan në OSB ka bërë një deklaratë në lidhje me situatën në Kosovë.
Zëvendës këshilltari politik Lewis Gitter në Këshillin e Përhershëm në Vjenë ka thënë se ShBA dhe Kosova janë partnerë të palëkundur.
Ai është shprehur se qëllimi i tyre është paqja, drejtësia dhe prosperiteti në Kosovë.
“Shtetet e Bashkuara dhe Kosova janë partnerë të palëkundur me një histori të fortë dhe ne jemi të përkushtuar ndaj sovranitetit dhe integritetit territorial të Kosovës. Qëllimi ynë është paqja, drejtësia dhe prosperiteti në një Kosovë demokratike dhe multietnike që është plotësisht e integruar në bashkësinë ndërkombëtare dhe pjesë e një Evrope të tërë, të lirë, elastike dhe të lulëzuar. Ne vazhdojmë t’i bëjmë thirrje qeverive të Kosovës dhe Serbisë që të zbatojnë plotësisht angazhimet e tyre të kaluara, të përmbahen nga veprimet dhe retorika që rrisin tensionet dhe të vazhdojnë të angazhohen në mënyrë konstruktive dhe me mirëbesim në Dialogun e lehtësuar nga BE-ja. Kjo është e vetmja rrugë realiste për një zgjidhje afatgjatë”, thuhet në deklaratën e tyre.
Misioni amerikan në OSB ka thënë që është thelbësore që Kosova dhe Serbia të arrijnë marrëveshje të përqëndruar në njohjen reciproke, përcjell Klanosova.tv.
“Prandaj është thelbësore që të dyja qeveritë të arrijnë përparim drejt një marrëveshjeje gjithëpërfshirëse, të përqendruar në njohjen reciproke. Ne kemi parë potencialin e Dialogut për të rritur stabilitetin rajonal me lidershipin dhe vullnetin e nevojshëm politik. E përshëndesim marrëveshjen e 27 gushtit të Presidentit Vuçiq dhe Kryeministrit Kurti që lehtëson udhëtimin ndërkufitar. Ne mbështesim fuqishëm udhëheqjen e Bashkimit Evropian në vazhdimin e punës së palodhur të diplomacisë brenda kornizës së Dialogut. Ka më shumë punë për të bërë. Palët duhet të vazhdojnë angazhimin e tyre serioz për zgjidhjen e çështjeve të pazgjidhura, përfshirë targat”, thuhet në njoftim.
Tutje, në deklaratë thuhet se ata presin me padurim ditën kur Kosova të jetë shtet pjesëmarrës i OSBE-së
“Megjithatë, vetëm duke dëgjuar drejtpërdrejt nga të dyja palët, ne mund të kuptojmë plotësisht dinamikën në terren dhe të përcaktojmë se si t’i trajtojmë ato më së miri. Ne besojmë se është për të ardhur keq që Kosova nuk është anëtare e këtij organi dhe për këtë arsye nuk është në gjendje të flasë vetë. Ne e presim me padurim ditën kur Kosova të jetë shtet pjesëmarrës i OSBE-së dhe kjo mund të ndodhë”, thuhet tutje në deklaratë.
