Gazeta Sinjali ka provuar të kontaktoj me Qendrën Klinike Universitare të Kosovës për të marrë përgjigje rreth disa udhëzimeve pa kritere nga QKMF-të për në QKUK.

Sinjali nuk ka arritur të marrë përgjigje nga QKUK. Disa prej drejtorëve të klinikave i kanë thënë Sinjalit se ata nuk e kanë të lejuar prononcimin pa marrë leje paraprakisht nga Ministria e Shëndetësisë.

Kjo sipas tyre është rregull i vënë së fundmi dhe ata janë të obliguar që ta respektojnë. I kontaktuar nga Sinjali, drejtori i Shërbimit Spitalor Klinik Universitar të Kosovës Basri Sejdiu nuk e ka mohuar një gjë të tillë, ai i ka sygjeruar Sinjalit që të bisedoj me Ministrinë e Shëndetësisë.

Nga ana tjetër, Ministria e Shëndetësisë thotë  se një gjë e tillë nuk qëndron, sipas tyre nuk ka të bëjë me ndalesa por me koordinim mes të gjithë akterëve.

“Në fillim të pandemisë, në mars, institucioneve shëndetësore u është lëshuar një qarkore informative në të cilën është kërkuar që informimi lidhur me pandeminë të jetë transparent dhe i koordinuar, meqë çdo kund në botë në situata të emergjencës së shëndetit publik, për të minimizuar keqkuptimet dhe informatat e pasakta, informimi bëhet në mënyrë të koordinuar dhe caktohen edhe personat që komunikojnë me publikun” thuhet në përgjigjen e MSh.

Sinjali në pyetjet dërguar Ministrisë së Shëndetësisë e ka specifikuar qartë se interesimi i Gazetës nuk ka pasur të bëjë me pandeminë por me një temë tjetër për të cilën ende nuk ka marrë përgjigje.Gazeta Sinjali