Miliarderi amerikan Bryan Johnson, i njohur për përpjekjet e tij të pazakonta për të ngadalësuar procesin e plakjes, ka bërë të ditur se është diagnostikuar me gastrit autoimun, një sëmundje kronike për të cilën aktualisht nuk ekziston një kurë përfundimtare.
Johnson, i cili ka investuar miliona dollarë në dieta, analiza mjekësore, suplemente dhe rutina intensive për optimizimin e shëndetit, ka treguar se sistemi i tij imunitar po dëmton qelizat e shëndetshme të stomakut.
“Stomaku im po e ha vetveten”, ka shkruar ai në një reagim publik, duke përshkruar situatën e tij shëndetësore.
Gastriti autoimun mund të shkaktojë probleme si mungesë të vitaminës B12, anemi dhe rritje të rrezikut për komplikime më serioze shëndetësore, përfshirë ndryshime në indet e stomakut.
Sipërmarrësi, i cili u bë i njohur për projektin e tij të jetëgjatësisë, ka thënë se synon të përdorë analiza të avancuara për ta kuptuar më mirë gjendjen e tij dhe për ta menaxhuar atë.
Johnson ka shpenzuar rreth 2 milionë dollarë në vit për monitorim të vazhdueshëm të trupit, ushqim të kontrolluar, ushtrime dhe procedura eksperimentale që synojnë ngadalësimin e plakjes.
Megjithatë, disa nga eksperimentet e tij kanë shkaktuar edhe polemika. Në vitin 2023 ai provoi transfuzion gjaku nga djali i tij adoleshent, ndërsa më vonë pranoi se kjo metodë nuk solli rezultatet e pritshme. Një vit më pas, një procedurë estetike shkaktoi një reaksion të rëndë alergjik.
Pavarësisht diagnozës së re, Johnson ka bërë të ditur se do të vazhdojë përpjekjet për të kuptuar më shumë rreth biologjisë së trupit dhe mënyrave për përmirësimin e shëndetit afatgjatë.
Sinjali – aty ku e vërteta flet para lajmit!