Kryetari i VMRO-DPMNE-së në Maqedoninë e Veriut Hristijan Mickoski tha se më e rëndësishmja për të është që kjo qeveri të mposhtet në zgjedhje. Ai këtë koment e ka bërë në pyetjen e një gazetari se po flitet muajt e fundit se do të ketë një shqiptar si kryeministër.
Mickoski theksoi se nuk ndërhyn në marrëveshjet e LSDM-së dhe BDI-së, por nëse shkon sipas ligjit, atëherë kryeministri muajt e fundit në qeveri teknike duhet të jetë nga radhët e partisë më të madhe në pushtet, që është LSDM.
“Nuk po hyj në marrëveshjet që ka kjo mazhorancë parlamentare para se të ndodhë kjo qeveri që u zgjodh në 2020, por ligji është i qartë. Ligji thotë se mandatarin e qeverisë teknike e propozon partia më e madhe në pushtet, tani nëse LSDM dhe Kovaçevski vendosin t’ia lëshojnë atë mandat BDI-së, kjo është punë e tij dhe unë nuk mund të ndërhyj këtu, as numrat nuk i kam për të ndërhyrë, sepse është vendimi i tij, jo i imi. Nëse lexojmë ligjin, kryeministri duhet të jetë nga radhët e partisë më të madhe në pushtet, në këtë rast është LSDM. Nëse do të jetë kështu dhe çfarë do të ndodhë mes tyre, nuk e di. Por kjo është një çështje dytësore”, tha Mickoski.
Sipas tij, çështja parësore është që sa më shpejt të ketë zgjedhje të parakohshme parlamentare në mënyrë që qeveria e BDI-së e mbështetur nga LSDM-ja të largohet.
“Çështja parësore janë zgjedhjet e parakohshme parlamentare dhe largimi i qeverisë së BDI-së të mbështetur nga LSDM-ja”, tha kryetari i VMRO-DPMNE-së.
