Kryetari i Këshillit Evropian, Charles Michel, u ka dërguar një letër ftesë liderëve të vendeve anëtare të BE-së para takimit të nesërm në Bruksel, në të cilën i njofton se ndër temat urgjente do të jetë edhe dialogu ndërmjet Kosovës dhe Serbisë.
Michel tha se ka çështje të rëndësishme të politikës së jashtme që shkaktojnë shqetësim dhe se në mesin e tyre është edhe raporti ndërmjet Prishtinës dhe Beogradit.
Ai theksoi se mbledhja e Këshillit Evropian vjen në një kohë të paqëndrueshmërisë dhe pasigurisë së madhe globale, të cilat së fundmi janë rënduar nga ngjarjet në Lindjen e Mesme.
“Ky zhvillim kërkon vëmendjen tonë urgjente pa na shkëputur nga mbështetja jonë e vazhdueshme për Ukrainën. Përgjegjësia jonë është të mbetemi të bashkuar dhe koherent dhe të veprojmë në përputhje me vlerat tona të përfshira në traktatet,” tha Michel në letrën e ftesës.
Ai vuri në dukje situatën në Lindjen e Mesme dhe se pret që në takimin e nesërm të dënojnë edhe një herë me forcë “sulmet terroriste brutale dhe pa dallim të Hamasit ndaj Izraelit dhe të njohin të drejtën e Izraelit për t’u mbrojtur, në përputhje me të drejtën ndërkombëtare humanitare”. Do të ketë gjithashtu një thirrje të përsëritur për lirimin e menjëhershëm dhe pa kushte të të gjithë pengjeve, tha Michel.
Ai gjithashtu theksoi se përkeqësimi i situatës humanitare në Gaza vazhdon të shkaktojë shqetësim të madh.
“Ne duhet të diskutojmë, para së gjithash, se si të sigurojmë urgjentisht shpërndarjen efektive të ndihmës humanitare dhe aksesin në nevojat më themelore. Së dyti, ne duhet të angazhohemi, në një front të bashkuar dhe koherent, me partnerët për të shmangur një përshkallëzim të rrezikshëm rajonal dhe rifillimi i procesit të paqes bazuar në zgjidhjen me dy shtete është e vetmja rrugë përpara. Së fundi, ne duhet të trajtojmë efektet e këtij konflikti në Bashkimin Evropian – kjo përfshin vështrimin e implikimeve të tij për kohezionin e shoqërive tona, lëvizjet tona të sigurisë dhe migracionit”, paralajmëroi Michel.
Një nga temat e takimit të nesërm do të jetë edhe migrimi, pra vlerësimi i hapave të ndërmarrë që nga diskutimi i fundit i samitit të BE-së në Granada.
“Ne do të mbulojmë gjithashtu çështje të tjera shqetësuese të politikës së jashtme – duke përfshirë situatën në Sahel, marrëdhëniet midis Prishtinës dhe Beogradit dhe Kaukazin e Jugut”, shkroi Michel.
