Në një konferencë, organizuar nga Klinika e Onkologjisë dhe Shoqata e Onkologëve të Kosovës, me rastin e shënimit të ditës botërore kundër Kancerit, u bë e ditur se 1 mijë e 586 raste të reja me kancer janë evidentuar gjatë vitit 2019 në Klinikën e Onkologjisë.

Drejtori i Onkologjisë, Ilir Kurtishi, bëri të ditur se edhe këtë vit janë përballur me sfida të shumta me pacientët e prekur me sëmundjen e kancerit, por që sipas tij, pavarësisht sfidave, ata janë munduar t’i ofrojnë shërbime të gjithëve.

Kurtishi tha se 217,143 shërbime janë dhënë në kimioterapi gjatë vitit 2019.

Ai bëri të ditur se në Kosovë numri i rasteve me kancer është më i vogël në krahasim me vendet tjera. Ndërsa, kryetari i shoqatës së Onkologëve, Arben Bislimi tha se kanceri është sëmundja e dytë më vdekjeprurëse, andaj duhet ta luftojmë.

Ndryshe, qëllimi i Ditës Botërore të Luftës Kundër Kancerit është vetëdijesimi dhe informimi i qytetarëve rreth kësaj sëmundje. /Gazeta Sinjali/