Rastet e mashtrimit me viza në Kosovë nuk janë të rralla. Shumë herë Sinjali ka raportuar se si kosovarët nga dëshira për të ikur nga vendi, kanë rënë pre e mashtruesve, të cilët u kanë premtuar viza. Për një rast të tillë është arrestuar dje një grua në Prishtinë, e cila po dyshohet se kishte ushtruar aktivitet pa leje pune dhe e njëjta i kishte mashtruar disa persona për sigurim të terminëve për viza pune në Gjermani, raporton Sinjali.
Ndaj Arlinda Baliut, Prokuroria Themelore në Prishtinë ka ushtruar kërkesë për caktimin e masës së paraburgimit.
“Ju njoftojmë se Prokuroria Themelore ne Prishtine ka paraqitur kërkesë për caktimin e masës se paraburgimit ndaj te pandehurës, e cila ka mashtruar te dëmtuar, kinse për t’iu siguruar termine për viza pune jashtë vendit, ne gjykatën kompetente”, kanë njoftuar nga Prokuroria.
Gjatë ditës së djeshme, Policia e Kosovës u ka bërë thirrje qytetarëve që mund të kenë qenë të mashtruar për terminë për viza pune jashtë vendit, të lajmërohen në Polici.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.