Projekte të rëndësishme që do të ndikonin në mirëqenien e qytetarëve kanë mbetur pa u realizuar që më shumë se një vit. Të njëjtat kapin vlerën e qindra miliona eurove. Kjo si shkak i masave kufizuese nga Bashkimi Evropian ndaj Kosovës. Ekonomistët u druhen paralajmërimeve për masa të reja, derisa thonë se kjo do të ishte goditje për ekonominë.
Në kohën kur po paralajmërohen masa të reja ndaj Kosovës, ato që u morën një vit më parë nga Bashkimi Evropian, veçse e kanë dëmtuar ekonominë e vendit.
Dëmet kapin vlerën e qindra miliona eurove, e bizneset janë ato që u dëmtuan më së shumti.
“Ne nuk kemi pasur mundësi që të përfitojmë prej projekteve të shumëta që ka ofruar Komisioni Evropian dhe Organizata të ndryshme. Vlera e këtyre projekteve shkon deri në 300 milionë euro”, thotë Lulzim Rafuna, kryetar i Odës Ekonomike të Kosovës.
Mirëpo, nga Aleanca Kosovare e Bizneseve thonë se vlera e dëmeve financiare mund të shkojë deri në 600 milionë euro.
“Përjashimi I Kosovës nga fonde të ndryshme të BE-së mund të shkojë humbja rreth 600 milionë euro, por nëse ne do të sanksionohemi më tutje, Kosova rrezikon të përjashtohet nga të gjitha mekanizmat e mbështjes financiare”, deklaron Agim Shahini, kryetar i Aleancës Kosovare të Biznesit.
Sipas njohësve të fushës, projektet të cilat kanë qenë të planifikuara me këto fonde, do të kontribuonin në rregullimin e infrastrukturës, trajtimin e ujërave të zeza e në reformat në administratë.
Përveç dëmeve financiare, vlerësohet se edhe imazhi i Kosovës para investitorëve të huaj është dëmtuar.
Masat kufizuese financiare ndaj Kosovës ishin vendosur nga Bashkimi Evropian një vit më parë, për shkak të situatës së krijuar në veri të Kosovës, ndonëse situate është kthyer në normalitet, masat vazhdojnë të jenë në fuqi.
Nga BE, gjatë qershorit të këtij viti patën thënë se nuk kishte pajtim të plotë të shteteve anëtare për heqjen e masave, ndonëse kanë paralajmëruar se si kompromis, të njëjtat do të hiqen gradualisht./RTK