Gazeta Sinjali ka siguruar ekskluzivisht detaje të operacionit të zhvilluar sot herët në mëngjes nga Drejtoria për Hetimin e Krimit të Organizuar dhe Krimeve të Rënda, në bashkëpunim me Prokurorinë Themelore në Mitrovicë, ku pas hetimeve disa mujore, janë bastisur tri lokacione në veri të vendit – dy në Mitrovicën e Veriut dhe një në Zveçan.
Në këtë aksion, si rezultat i një urdhër-kontrolli të lëshuar nga Gjykata Themelore në Mitrovicë, është zbuluar një punishte e sofistikuar për modifikimin dhe prodhimin e armëve, ku janë sekuestruar sasi të mëdha armësh të paautorizuara, municione, pajisje për përpunim dhe pjesë për armë zjarri.
Burimet e Sinjalit bëjnë me dije se Halim Ljaçkoviq, 67-vjeçar, i dyshuari kryesor dhe pronar i njërës nga hapësirat e bastisura. Ai është ndaluar me vendim të prokurorit për 48 orë.
Në vendin e ngjarjes janë sekuestruar: 11 armë të gjata, përfshirë modele të ndryshme të pushkëve dhe armëve sportive; 2 pistoleta, njëra e llojit Beretta; 20 bajoneta, 36 karikatorë, 320 gëzhoja, 61 fishekë gjuetie dhe 43 fishekë për pistoleta; 59 tyta armësh, 87 pjesë të tjera mekanike, dhe 27 pajisje për stampimin e numrave serikë; 3 torno industriale për përpunimin e armëve, që sipas hetuesve dyshohet se janë përdorur për modifikim dhe prodhim të armëve ilegale; Telefona, dokumente, fletore me shënime dhe një sasi të konsiderueshme pjesësh për ndërtim armësh.
Rasti është iniciuar për veprën penale: “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materialeve plasëse”.
Ministri në dorëheqje i Punëve të Brendshme, Xhelal Sveçla, ka njoftuar Policia ka realizuar një operacion policor nga i cili është identifikuar një punëtori në të cilën janë modifikuar armë të llojeve të ndryshme.
Këtë ai e ka quajtur “terrorizëm i sponsorizuar nga Serbia”.
“Terrorizmi i sponsorizuar nga Serbia si në rastet si ky sot, nuk kanë dhe nuk do të kenë më vend në Kosovë. Nuk do të ndalemi, në çdo cep të Republikës sonë”.
Sinjali – aty ku e vërteta flet para lajmit!
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.