Një aksident i rëndë në trafik ka ndodhur mbrëmë rreth orës 19:00 në fshatin Randobravë të Prizrenit, ku një veturë ka goditur për vdekje një këmbësor. Blerim Sezairi, 40-vjeçar, ka ndërruar jetë në vendin e ngjarjes, teksa vdekjen e tij e ka konstatuar mjeku i ekipit të Emergjencës, raporton Gazeta Sinjali.
Burimet e Gazetës Sinjali kanë bërë me dije se shoferi që dyshohet se shkaktoi aksidentin e rëndë, është Dokleat Velija, 28-vjeçar.
Velija dyshohet se për shkak të mospërshtatjes së shpejtësisë me kushtet e rrugës ka goditur me veturën e tij Sezairin, i cili mbeti i vdekur në vend.
I riu është arrestuar dhe është shoqëruar në stacion policor, ku pas intervistimit me urdhër të prokurorit është dërguar në mbajtje.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.