Zëdhënësi i Kremlinit, Dmitry Peskov, ka reaguar ndaj presionit të Bashkimit Evropian për një marrëveshje armëpushimi deri të hënën në mbrëmje, duke e cilësuar këtë si një qasje të gabuar ndaj Rusisë, shkruan Gazeta Sinjali.
“Gjuha e ultimatumeve është e papranueshme për Rusinë, nuk është e përshtatshme. Nuk mund të flasësh me Rusinë në një gjuhë të tillë”, deklaroi Peskov në një bisedë me gazetarët, raportoi AFP. Ai theksoi se Moska mbetet e përqendruar në kërkimin e një zgjidhjeje paqësore dhe afatgjatë, por nuk dha përgjigje nëse presidenti Putin do ta pranonte ftesën e presidentit ukrainas Zelenskyy për t’u takuar në Stamboll.
Presioni diplomatik ndaj Rusisë është shtuar pas një deklarate nga qeveria gjermane, e cila kërkoi nga Moska që të bjerë dakord për një armëpushim 30-ditor pa kushte deri në fund të ditës, ndryshe do të përballet me sanksione të reja.
“Nëse Moska nuk e pranon kërkesën, do të vihen në lëvizje përgatitjet për sanksione të reja,” u shpreh zëdhënësi i qeverisë gjermane, Stefan Kornelius, duke paralajmëruar se “ora po ecën”.
Ndërkohë, të dielën, presidenti rus Vladimir Putin kishte refuzuar një tjetër ultimatum nga liderët evropianë për arritjen e një armëpushimi me Ukrainën. Në vend të kësaj, ai kishte propozuar mbajtjen e negociatave të drejtpërdrejta me Kievin gjatë kësaj jave – ofertë që u refuzua nga BE-ja me arsyetimin se “s’mund të ketë paqe, nën zjarr”.
Sinjali – aty ku e vërteta flet para lajmit!