Kosova ka pranuar sot një donacion prej 100 mijë teste PCR nga Fondacioni për Shoqëri të Hapur, raporton Gazeta Sinjali.

Ky donacion, procedurat e të cilit filluan në shtator, kap vlerën e 1.5 milion eurove.

Kështu ka bërë të ditur ministri i Shëndetësisë, Armend Zemaj përmes një postimi në Facebook.

“Donacioni është kontribut i çmueshëm në rritjen e fuqisë testuese për diagnostikimin e infeksionit COVID-19 në Kosovë, për çka e falënderoj z. Luan Shllaku, drejtor ekzekutiv i Fondacionit për Shoqëri të Hapur (KFOS) si dhe kryeministrin z. Avdullah Hoti, për angazhimin e pakursyer për dhe rreth këtij donacioni duke e iniciuar dhe realizuar atë”, ka shkruar Zemaj.

Tutje, ministri Zemaj ka bërë të ditur në vazhdimësi janë duke i koordinuar aktivitetet me donatorët e ndryshëm.

“Kosova është falënderuese ndaj çdo donacioni që merr nga partnerët ndërkombëtar”, ka përfunduar ai. /Gazeta Sinjali/