Kosova ka shënuar një rritje të ndjeshme të vizitorëve gjatë vitit 2024. Sipas Agjencisë së Statistikave të Kosovës (ASK), nga janari deri në dhjetor, në vend kanë hyrë gjithsej 6 milionë e 938 mijë e 227 vizitorë të jashtëm, bazuar në të dhënat e grumbulluara nga pikat kufitare.
Të dhënat janë bërë publike të premten në kuadër të hulumtimit të Hotelerisë dhe Turizmit, ku është prezantuar edhe shpërndarja e net-qëndrimeve.
“Numri i net-qëndrimeve ishte 1 milionë e 522 mijë e 890, prej tyre 45,6% nga vendorët dhe 54,3% nga të huajt”, thuhet në tabelën e prezantuar nga agjencia.
Sipas ASK-së, gjatë vitit 2024 është regjistruar rritje e përgjithshme e vizitave krahasuar me vitin paraprak.
“Në vitin 2024, numri i vizitorëve vendorë është rritur për 4,2% në raport me vitin 2023, kurse net-qëndrimet vendore janë ulur për (-13,2%). Ndërsa, ka rritje të vizitorëve të jashtëm për rreth 18,3%, kurse net-qëndrimet e tyre janë rritur për 10,9% në raport me vitin paraprak”, thuhet në njoftim.
Rajoni me numrin më të lartë të vizitorëve vendorë ishte Prishtina, me 205,405 vizitorë, ndërsa Peja kryeson për nga numri i net-qëndrimeve, me 591 mijë e 673 të tilla.
Në aspektin e turizmit të jashtëm, ASK konstaton një rritje domethënëse krahasuar me vitin 2023.
“Në total ishin 423 mijë 282 vizitorë të huaj, nga të cilët numri më i madh është nga Shqipëria, Gjermania, Zvicra, Turqia etj”, thuhet në njoftim.
Sinjali – aty ku e vërteta flet para lajmit!