Ditëve të fundit në seancat plenare jo të gjitha ulëset kanë qenë të zëna, jo për faktin e njohur tashmë që përfaqësuesit e popullit ndonjëherë mungojnë pa arsye, por për shkak të COVID-19.

Përveç Kryekuvendarit, Glauk Konjufca dhe nënkryetares së Kuvendit, Saranda Bogujevcit me koronavirus janë infektuar edhe disa deputetë, shkruan Gazeta Sinjali.

Së fundmi pozitiv ka rezultuar deputeti i AAK-së, Besnik Tahiri, i cili ka treguar se ka simptoma jo edhe të lehta.

“Pas testimit, kam marrë konfirmimin se kam rezultuar pozitiv me COVID-19. Edhe pse i vaksinuar me dy doza, virusi ka simtoma jo të lehta, e në veçanti për ata që kanë probleme tjera shëndetësore”, ka shkruar Tahiri.

Virusi e ka prekur edhe deputetin e PDK-së, Bekim Haxhiun mirëpo ai ka thënë se deri më tani ka simptoma të lehta.

“Pas dy testimeve të bëra në 24 orët e fundit rezultova pozitiv me COVID-19.  Në këto dy vite të pandemisë për herë të parë kam rezultuar pozitiv. Duke qenë i vaksinuar me dy dozat  e vaksinave, simptomat janë të lehta. Bazuar në rekomandimet e IKSHPK-së në ditët në vijim do të jem në izolim, derisa të rezultoj negative”, ka shkruar Haxhiu.

Ditë më parë pozitiv me koronavirus ka dalë edhe ministrja e Industrisë, Ndërmarrësisë dhe Tregtisë, Rozeta Hajdari.

Vetëm në 24 orët e fundit në Kosovë janë regjistruar 2.390 raste të reja me COVID-19. /GazetaSinjali/