Kandidati i Lëvizjes Vetëvendosje për asamble komunale në Junik, Lulzim Gacaferri, ka reaguar lidhur me arrestimin e Flamur Kuçit, djalit të kryetarit të Junikut, Agron Kuçit dhe zyrtares së kësaj komune, Blerina Sallaj, të dyshuar për dallavere me vota, raporton Gazeta Sinjali.

Gacaferri i ka thënë Kuçit se duhet të ketë turp, për atë që thotë se ia ka bërë Junikut.

“Turp duhet me të ardhë o Agron Kuçi, çka dite me i bo Junikut. Turp, Turp, Turp! Shumë të respektuar qytetarë të vendit tim, Kërkoj nga ju ju lutem të ruani qetësin të kalojmë së bashku këtë të keqe që i ndodhi vendit tonë”, shkroi ndër të tjera ai.

Kuçi u arrestua dje, ndërkaq Sallaj të premten. Të dy dyshohen se kanë kryer veprën penale “Dhënie ose marrje e ryshfetit në lidhje me votimet”.

Me vendim të prokurorit, ata janë dërguar në mbajtje për 48 orë.

Çka gjeti Policia në valixhen e Blerina Sallajt në Aeroportin e Prishtinës?

Sallaj të premten ishte nisur për në Gjermani, me ç’rast Policia e Kosovës kishte gjetur në bagazhin e saj me qindra dokumente të votuesve të diasporës në komunën e Junikut të përgatitura paraprakisht, në mënyrë të organizuar në emër të votuesve të Junikut nga diaspora. Me këtë rast Policia ka sekuestruar telefonin e saj dhe një laptop me fletëvotime të diasporës dhe listën e votuesve në Junik për kryetar të komunës së Junikut në zgjedhjet e 14 nëntorit, shkruan Gazeta Sinjali.

Dosja që dyshohet të jetë e falsifikuar përmban kopje të letërnjoftimeve, lista me emra të 200 personave, të përgatitura për votim nga diaspora.

Sallaj gjatë intervistimit, siç ka mësuar Sinjali, ka deklaruar se këtë material ka pasur të ia dërgojë vëllait të kryetarit të komunës së Junikut, Agron Kuçit.

Sipas burimeve të Sinjalit, Blerina Sallaj është një nga bashkëpunëtoret më të ngushta të Agron Kuçit, i cili është kandidat nga AAK për kryetar të Junikut. Dyshohet se e arrestuara në bashkëkryerje edhe me persona të tjerë, ka tentuar që të dërgojë në mënyrë të organizuar votat nga diaspora në mbështetje të kandidatit Agron Kuçi.

Dje, Sinjali po ashtu raportoi se në Komunën e Junikut ka zbarkuar Drejtoria e Krimeve të Rënda, në kërkim të provave dhe të dyshuarve të tjerë që lidhen me rastin e dokumentacionit zgjedhor që dyshohet se u falsifikua në këtë komunë.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata. /Gazeta Sinjali/