Një ditë para mbledhjes së përbashkët të Kuvendit të Kosovës dhe Kuvendit të Shqipërisë, Kuvendi i Kosovës ka publikuar agjendën e mbledhjes.
Në njoftimin e Kuvendit thuhet se në shënim të 110-vjetorit të Pavarësisë Shqipërisë, të dielën, më 27 nëntor 2022, në orën 10:00, në Kuvendin e Republikës së Shqipërisë në Tiranë, do të mbahet mbledhje e përbashkët e Kuvendit të Republikës së Kosovës dhe Kuvendit të Republikës së Shqipërisë.
Sipas agjendës do të flasin kryetarja e Kuvendit të Shqipërisë, Lindita Nikolla, kryetari i Kuvendit të Kosovës, Glauk Konjufca.
Pastaj do të flasin kryeministrat Edi Rama dhe Albin Kurti.
Në njoftim thuhet se fjalim do të mbajnë edhe ministrja e Shtetit për Mardhënie me Parlamentin e Shqipërisë Elisa Spiropali dhe ministrja e Punëve të Jashtme të Kosovës Donika Gërvalla.
Po ashtu fjalime do të mbajnë edhe shefat e grupeve parlamentare të dy kuvendeve.
