Në një përpjekje për të forcuar lidhjet tregtare me kontinentin afrikan, Kina ka njoftuar se do të eliminojë tarifat mbi importet nga të gjitha vendet afrikane me të cilat mban marrëdhënie diplomatike, shkruan Gazeta Sinjali.
Ky vendim u bë i ditur gjatë një takimi të nivelit të lartë Kinë-Afrikë dhe vjen në një moment kur disa vende afrikane përballen me perspektivën e rritjes së ndjeshme të tarifave nga Shtetet e Bashkuara.
Kina, e cila është partneri më i madh tregtar i Afrikës për 15 vitet e fundit, importoi mallra me vlerë rreth 170 miliardë dollarë deri në vitin 2023. Masa e re zgjeron marrëveshjen e vitit të kaluar që përfshinte 33 vende “më pak të zhvilluara”, duke përfshirë tani edhe ekonomi më të mëdha si Afrika e Jugut dhe Nigeria.
Eswatini është i vetmi përjashtim nga skema, për shkak të njohjes së Tajvanit si shtet të pavarur – një hap që bie ndesh me politikën “Një Kinë” të Pekinit.
Lëvizja e Kinës shihet si kundërpërgjigje ndaj politikave proteksioniste të administratës Trump, e cila ka paralajmëruar tarifa të reja mbi importet nga shumë vende, përfshirë disa shtete afrikane. Ndërkohë, marrëveshja aktuale e SHBA-së me vendet afrikane për tregti pa tarifa (Agoa) mbetet e pasigurt nëse tarifat e reja do të zbatohen.
Pjesëmarrësit në samitin Kinë-Afrikë dënuan tarifat e njëanshme të vendosura nga disa shtete dhe bënë thirrje për një rend ekonomik të bazuar në “barazi, respekt dhe përfitim të ndërsjellë”.
Sinjali – aty ku e vërteta flet para lajmit!