Paratë e shtetit për karburante i kanë shfrytëzuar 67 deputetë të Kuvendit të Kosovës, për muajt nëntor dhe dhjetor 2021. Prej tyre, 36 janë të partisë në pushtet, Lëvizjes Vetëvendosje.
Listën me emrat e këtyre deputetëve e ka publikuar shefja e Grupit Parlamentar të kësaj partie, Mimoza Kusari-Lila.
Sipas kësaj liste, vetëm për shpenzime të rrugës të këtyre deputetëve për pjesëmarrje në seanca janë shpenzuar mbi 8 mijë euro, derisa për shpenzime të rrugës për pjesëmarrje në komisione janë shpenzuar mbi 5 mijë e 400 euro.
Kusari-Lila sot po ashtu njoftoi se deputetët e kësaj partie do të tërhiqen nga kompensimi i shpenzimeve të udhëtimit.
Ky vendim i partisë në pushtet vjen pas publikimit të listës me emrat e deputetëve, që kanë shpenzuar qindra euro nga kuleta e shtetit për karburante.
“Aktualisht në legjislaturën e VIII të Kuvendit, janë 67 deputetë të cilët kanë të regjistruar vendbanimin jashtë Prishtinës dhe prej tyre 36 janë nga Lëvizja Vetëvendosje.
“Me anë të këtij njoftimi duam të informojmë opinion publik, se deputetët e Lëvizjes Vetëvendosje, si shumicë parlamentare, vullnetarisht do të tërhiqen nga kompenzimi i shpenzimeve të udhëtimit dhe njëkohësisht thërrasin edhe deputetët tjerë të aplikojnë të njëjtin standard. Gjithashtu, do të kërkojmë nga Kryesia e Kuvendit, rishikimin e vendimit për kompenzimin e deputetëve.”
